كحلة لعيون
دازت احدايا
غزالة امكحلة لعيون
من النظرة الاولى
خلاتني مجنون
قالت برموشها
انت مقبول
واتبعني
الى كنت معقول
قلت ليها
آش المعمول
قالت توكل ع الله
الى كان بزطامك محلول
والى كان قلبك ما يعرف الهول
والى كنت معلول
غير بعد ل تيساع
راني شبعانة
من لكلام المعسول
بالتجربة
مول اللسان المسلول
فالاول حاني الراس مدلول
وفي الاخر يرجع وحش غول
قلت ليها
خوك درويش
الى لصق ما يزول
قالت
بغيت صداقي يكون مكمول
والى ناوي لحلال
رجلي برجلك عند لعدول
فاجئتني رديت وانا خجول
كلامك فوق راسي معمول
اللي زرع الخير
اينال المحصول
هذا هو المظنون والمأمول
وحتى حد ما بقى مغفول
قالوها اصحاب لعقول
يا لالة
من هنا ماني منقول
حتى نديروا اللازم
وندبحوا لعجل
وانضربو لغيوط والطبول
بقلم
محمد لمراحلي
فاس
تعليقات
إرسال تعليق