ريشة )
المشرب ليس بيعيداً
ما جدوى ذلك
أنت كما الإسفنجة
تمتص الحانات ولا تسكر
( النواب )
@@@@
(( حانة ، وسكران ،ومجنونة ))
@@@
دمعه بكبر الكون بعينك
وهموم بصدرك مدفونه
وعمر مطشّر
عام هنانه ، وعشره هناك
والباجي الله اليعلم بيهن
وين بياديره التگضيهن
ويا ديره الممكن مامونه ..؟
وعيونك .. آه من عيونك ،
ولايات بنص جرحي وتبچي ،
مهجوره بگد ما مسكونه
وشوگك رحّى
وتطحن بالروح المطحونة
والّليله الكنست باجيها،
ما ظل بيها ،
بس إنته وهاي المجنونه
والنادل سد باب الحانه ،
خجلان يطردك بلسانه ،
بس لازم تقره البعيونه
سكران انته ،
والويّاك اكبر مجنونه
ياهو الياخذكم للبيت ...؟؟!!
ويابيت اللي تندلّون ..؟؟
والشارع أطول من خلگك ،
وانته عيونك ،، آه عيونك
مشبوحه لذيچ الرازونه
لو هسّه انته بباب الشرجي ،
جيبك متروس بحب رجّي،
وربعيّه ،، وبيك ،، وليمونه
هذا اليضحك
وذاك اليحچي
وهذا يجر موّال ويبچي
وذاك يكمّلها (بدلعونه)
لاتهتم خل يحچي اليحچي
بالتأكيد الماشاربها،، يحد اسنونه
وبالمطعم من تگعد تاكل ،
لگمه بحلگك ،
وشويّه بحلگ البزونه
اللللللله شگّد حلوه الوادم ،
والاحلى اللي بعقله يشوفك ،، مو بعيونه
هذا تگلّه شلونك عيني ،
وذاك يگلّك أهلاً ورده
ولو سكران وطحت بشارع ،
ترابه يحضنك ويغنيلك ،
وحتى السيد بيده يشيلك ،
ويدعي تتوب ببخته وجده
ولو كُلِّش كُلِّش ما تگدر ،
تَوْصيلَك ذِبّه اعله النجده
كلها تحن عليك هناك
حتى الميّت ،
يمكن يفزع لك من گبره
وينطيك الچفن اللي عنده
عمر وفات ومر وتعدّه
بس وشاله الظلّت منّه ،
وين اتحطها ..؟ ،
وياهو اليرضه تحطها بسدّه ...؟؟
واللي چانت طفله بوكتك
صارت جدّه
والشاطي الچنت انته بوكتك
گلادة صدره ،، وشامة خدّه
سَل چاليّه ،، ومايه تبدّه
شيرِدّك (* للخضر) الشلته سنين بگلبك ،
وتتنقّل بيه كل هالمدّه
شيرِدّك (* للبوجّاولي) ..؟؟؟
(* لشعيّل جوده) الله يرحمه ..؟؟
(* وتنياده) وضحكة (* أُم ندّه ) ...؟؟
ياگلبي الما چنّك تدري
لازم تدري
صندوگ العرس اللي يعتگ ،
ينباع بسوگ الحب خرده
ينباع بسوگ الحب خرده
@@@
*الخضر : قضاء تابع لمحافظة السماوه
*آل بوجاولي : من عشائر قضاء الخضر ،، السماوة
*شعيّل جوده : شيخ عشيره آل بوجاولي
*تنياده : أم الشيخ شعيّل
*أُم ندّه : إمرأة من عشيرة آل بوجاولي
..
تعليقات
إرسال تعليق